Երբ տոմսակները կը գնէք, ձեզմէ կը խնդրենք մասնակիցներուն թռիչքներուն տուեալները։ Զարմանազանի աշխատակազմէն անձեր պատրաստ կը գտնուին օդակայանը՝ դիմաւորելու համար բոլոր մասնակիցները, որոնք կ՚անցնին ապահովութեան կէտէն եւ կ՚առնեն իրենց ճամբրուկները։ Եթէ ուշացում կամ ջնջում պատահի, նոյնպէս մենք կ՚աջակցինք մասնակիցներուն։

Երբ ձեր դիմումը ընդունուի եւ ձեր անցագիրը ուժի մէջ ըլլայ, կը ղրկենք պաշտօնական հրաւէր մը, որպէսզի վիզայի դիմումին ընթացքին կարենաք ներկայացնել։ Շէնկէն վիզայի պէտք պիտի ունենաք։ Ժամանումը Զուիցերիոյ Ժընեւ օդակայանը պիտի ըլլայ, որ կը գտնուի Շէնկէնի տարածքին մէջ։ Անհրաժեշտ դիմումները ձեր երկիրին մէջ ամբողջացնելը ձեր պատասխանատուութիւնն է, մենք միջամտելու առիթ չունինք։

Օդանաւային իւրաքանչիւր ընկերութիւն առանց ուղեկցողի ճամբորդող անչափահասներուն համար իրեն յատուկ օրէնքները ունի։ Ոմանք անչափահասներու համար ուղեկցող անձեր կը հայթայթեն։ Երբ տոմսակը կը գնէք, այս նիւթը օդանաւային ընկերութեան հետ ճշդելը ձեր պատասխանատուութեան տակն է։

Եթէ փոխադարձ համաձայնութեամբ բացառիկ պարագաներ գոյութիւն չունին, մասնակիցները չեն կրնար փոխել իրենց կեցութեան օրերը։

Կեցութիւնը կը սկսի այն պահուն, երբ մասնակիցը օդակայանը կամ կայարանը կը դիմաւորուի։ Որպէսզի բոլոր մասնակիցները նոյն պայմաններու մէջ գտնուին, չենք կրնար արտօնել որ ծնող մը կամ բարեկամ մը մասնակիցին ընկերակցի մինչեւ կեցութեան վայրը։

Այս ընկերակցութիւնը ֆրանսական ոչ-շահաբեր կազմակերպութիւն մըն է, որուն նպատակը մասնաւորապէս արեւմտահայերէնի գործածութիւնը եւ փոխանցումը տարածելն է։ Զարմանազանի մանկավարժական, նիւթական, ապահովական բոլոր կէտերուն համար ընկերակցութիւնը պատասխանատուն է ֆրանսական օրէնքի եւ Ֆրանսայի Երիտասարդութեան եւ Մարզանքի նախարարութեան դիմաց։ Հետեւաբար, արձանագրութեան եւ Զարմանազանի կազմակերպութեան բոլոր ընթացքներուն պաշտօնապէս նշուած է Հազար ու մէկ Ընկերակցութիւնը։